هي لمحة صغيرة عن الدراسة لامتحان الكولكيوم و بالإقامة بشكل عام , بتمنى تكون مفيدة و إذا في أي ملاحظة الإيميل موجود ...

 

الأسئلة كثيرة التوارد في هذا الصدد :

 

 

أنا ما رح اكتب شو في كتب موجودة بالسوق و قول إنو لازم تقرا كل شي , بس الشي اللازم تعرفوا إنو في كتب مراجع كبيرة و في كتب صغيرة يعني ما فيها كتير توسع ...

من المراجع : Campbel ( مرجع من 4 أجزاء , فيه رضية حوالي 700 صفحة تقريباً و الباقي أورتوبيديا من كل شي .. ) هاد الكتاب حلو , بيسموا على النت The bible of orthopedics. هو فعلاً كتير واسع و شامل و فيه التكنيكات الجراحية اللي بدك ياها .

في مرجع Rockwood ( مرجع من 3 أجزاء ) كلو رضية ... يعني فعلاً هاد الكتاب شغلة كبيرة كتير . في شرح وافي لكل كسر ممكن يخطر ببالك , مع طرق العلاج الموصوفة , و بيحط طريقة العلاج اللي المؤلف بيفضلها لكل نوع من الكسور ( يعني إذا الروكوود قال شي , لازم تفكر منيح قبل ما تساوي شي تاني!!)

في مرجع Skeletal Trauma ( مرجع من 3 أجزاء ) كلو رضية - من اسمو - كتير ظريف و حلو , بس في سرد كتير , إلو آراء بتختلف شوي بس فعلاً كتير واسع.

في مرجع Tachadjian ( مرجع من 3 أجزاء ) كتاب خاص بالجراحة العظمية أطفال , ما رح تلاقي كتاب واضح و سلس بطرح الأفكار و الأمراض متلو , بكل بساطة كان المرجع رقم واحد بالشعبة العظمية بالجراحة العظمية عند الأطفال.. في بالجزء الثالث قسم خاص لرضوض الأطفال مع شرح وافي . و هو متوفر Textbook و Atlas .

طبعاً أطلس التاكجيان قيم جداً جداً ....

من المراجع Chapman (اللي عندي ياه هو السيدي , ما بعرف من كم جزء ) من الكتب الظريفة, فيه أورتوبيديا و رضية , طريقة عرضو للأفكار حلوة و ظريفة .. من المواضيع المميزة اللي قريتها فيه كان موضوع اليد الشللية...

 من الكتب Lovell and Winter , هاد الكتاب عندي ياه على جهاز الi mate , ما عندي ياه كتاب ... كتاب جراحة عظمية أطفال , واضح و مفيد جداً بس أكيد مو بشمول التاكجيان.. ضروري يكون على جهازك...

في كتب تخصصية بالعمود الفقري متل  Adult and Pediatric Spine , Surgery of the Spine , مفيد جداً , بس بما إنو نحنا ما منتعلم عن العمود الفقري غير الجنف و شوية حدب ... بيضل مرجع وقت الحاجة...

من الكتب اللي موجودة و البعض كان يعتمد عليها : Current, Staheli , و كتب تانية , هي كتب صغيرة (صغيرة يعني شي 700 - 1000 صفحة) مو مرجع , في شرح مختصر بس مركز للرضية و الأورتوبيديا ...

الكامبل لحالو ما بيكفي , الروكوود بالرضية ملك , التاكجيان بالأطفال شي ضروري .... بالنهاية الكامبل بدك ياه بمواضيع ما في مرجع إلها , خاصة البتور , الإيثاقات, تبديل المفاصل و غيرها.... 

----------------------------

كتب الأسئلة مهمة و ضرورية , بصراحة أنا ما قريتها إلا منشان الفحص , بس هيه بالفعل مهمة , فيك تتسلى فيها بالأوقات الميتة , منها سؤال و جواب و منها أسئلة متعددة الخيارات ....

البورد ريفيو , كتاب أسئلة و أجوبة , ظريف جداً جداً , فيه مواضيع يمكن تتفاجأ إنها بتدخل بمجال جراحة العظام , و بالنهاية كلو ممكن يجي بالفحص ...

أسرار جراحة العظام Orthopedic Secrets , سؤال و جوابو , واضح و مفيد جداً جداً , خاصة ببحث مفصل الركبة ...

أسئلة البري تست Pretest , أسئلة متعددة الخيارات , مفيد جداً , و لحد الآن لازم يجي منو على الأقل سؤالين بكل دورة , أنا بصراحة حفظتو , بصم , قبل يومين من الامتحان راجعتو خلال 4 ساعات .... تقريباً 750 سؤال ...

أسئلة مراجعة في الجراحة العظمية Review Questions , كتاب جديد و ظريف و حلو و مفيد جداً ... خاصة بحث العمود الفقري فيه , احرص إنك تقراه , بس في ملاحظة , إنو الكتاب المترجم للعربي , ما فيه كل الأسئلة اللي بالإنكليزي .. على الأغلب في أخطاء إملائية, انتبه...

الشيفام , أنا ما قريتو , و مابعرف عنو شي ( غير إنو مو مفيد ... هيك قالولي!!) ....

بالمختصر كتب الأسئلة ضرورية و لازم تقراها كلياتا , طبعاً فيك تجمع الأفكار المهمة على دفتر خاص , رح تلاقيه جاهز وقت الامتحان , و صدقني أي معلومة مجمعة على جنب حقا دهب قبل الامتحان ...

----------------------------

القراءة باللغة الأجنبية (يعني من الكتاب الأجنبي نفسو) طبيعي أفضل , لإنو بكل صراحة لهلأ ما في ترجمة جيدة و واضحة لأي كتاب ... تانياً (سبحان الله ) مدري كيف اللغة الإنكليزية واضحة و سلسة بالتعبير...

مع ذلك أنا وقت اللي حضرت للامتحان , قريت كتب الأسئلة بالعربي , بس كان الكتاب الإنكليزي جنبي , برجعلو في حال كان السؤال فيه لبس أو مو واضح ... بالنهاية الامتحان بالعربي , لازم تتعود على المصطلحات العربية ...

----------------------------

على مدة سنين , كل أسبوع , كان في محاضرة عن موضوع معين بالجراحة العظمية (بإشراف د. بشار ميرعلي), و على فكرة هالمحاضرات كانت تتساوى بعرض تقديمي سلايدات و بعدين على الكمبيوتر و كانت تتحضر على أوراق , و هيه من كزا مصدر (أغلبها من الكامبل و في كمان مصادر تانية متل التاكجيان و الروكوود حسب الموضوع ) .. يعني المحاضرة مو بس ترجمة حرفية ...

و بصراحة لما عم تقرا هالكم ورقة عم بيصير عندك فكرة واضحة عن الموضوع , بس أكيد مو يعني بيكفي ...

في كتاب محاضرات بالجراحة العظمية عند الأطفال , فيك تعرف عنو بهالرابط .

----------------------------

المدة اللازمة للتحضير لامتحان الكولكيوم بتعتمد عليك, يعني ببساطة إذا كنت خلال مدة الإقامة عم تدرس , هدا كلو بيوفر وقت ..

رح قللك شغلة, أنا ما درست الرضية أبداً قبل الامتحان , الشي اللي ركزت عليه كان زوايا الرد المقبولة بالكسور , أما التصانيف و المداخل الجراحية , كلها لازم تكون عندك اضطلاع عليها من قبل ....

لازم يكون في عندك ملخصات للأشياء المهمة بكل شي , هاد كلو بيسهل عليك الدراسة...

----------------------------

بكل محاضرة كان ينطرح موضوع معين , و كان بآخر المحاضرة يصير مجموعة من الأسئلة , بصراحة أحلى شي بالمحاضرة هوه هي الأسئلة و أكتر شي كان يخوف اللي عم يلقي المحاضرة ... أنا بصراحة سجلت هالملاحظات و كتبتا , و فيك تحصل عليها هون من هالملف( اضغط هنا)

----------------------------

خلال فترة الدراسة للامتحان و حتى من قبل, كل ما لاقي شي تعداد أو حتى شي معين ممكن ما ينحفظ بسهولة, كنت اكتبو عندي علىi mate , حتى صار عندي مجموعة من الملفات بمجموعة من المواضيع بالجراحة العظمية . و الشي الأكتر أهمية و اللي ممكن تفيدك حتى بالحياة العملية هيه مجموعة الملفات الخاصة بالزوايا المقبولة لرد الكسور عند الكبار و الأطفال. فيك تحصل على هي الملفات..... اضغط هنا

فيك تحتفظ بالملفات عندك على الموبايل أو i mate , في كمان ملف فيه كل الملخصات بتصير متل النوطة بتنطبع معك بسهولة....

 


22-10-2008

MoKazem.com

17 December, 2009

آخر تعديل

 

Hit Counter Free counter and web stats